Saturday, January 24, 2009

யாருக்கு இழப்பு?


அவன் ஒரு கல்லூரி மாணவன்.படிப்பிலும் விளையாட்டிலும் வல்லவன்.நிறைய நண்பர்கள் ,நண்பிகள்.அதே கல்லூரியில் படிக்கும் ஒரு பெண் மீது அவனுக்கு காதல்.ஆனால் அதை அவளிடம் சொல்லத்தான் தைரியம் இல்லை அவனுக்கு.நண்பர்கள் எல்லோரும் சேர்ந்து அவனுக்குத் தைரியம் கொடுத்தனர். அவள் உன்னை மறுப்பதற்கு வாய்ப்பே இல்லை , நீ சொல் அவளிடம் என்றனர்.இவனும் தயங்கித் தயங்கி ஒரு நாள் அவளிடம் தன் விருப்பத்தை சொன்னான்.அவள் உடனேயே தெளிவாக மறுத்து விட்டாள்,மேலும், ஒரு நாளும் அவனிடத்தில் தனக்கு எந்த ஈர்ப்பும் ஏற்பட்டதில்லை என்றாள்.அவன் அதற்கு மேல் அவளிடத்தில் ஏதும் சொல்லாது சென்றான்.

மறுநாள் அவன் நண்பர்கள் அவனைப் பார்க்கச் சென்றனர்.மிகுந்த வருத்தத்தில் இருப்பவனைத் தேற்றி கல்லூரிக்கு வரச் சொல்ல வேண்டும் என்றிருந்தனர்.ஆனால் அவர்கள் அவனைப் பார்த்த போது வழக்கம் போல மிகுந்த உற்சாகத்துடன் கல்லூரிக்கு கிளம்பிக் கொண்டிருந்தான்.நண்பர்கள் ஆச்சரியத்துடன் விசாரித்தனர். அவன் " அவள் என்னை மறுத்ததற்காக நான் ஏன் கவலைப்பட வேண்டும் ? உண்மையில் அவள் மேல் மிகவும் அன்பு வைத்திருந்த , அவளுக்காக எதையும் செய்யத் தயாராக இருந்த ஒருவனை அவள்தான் இழந்திருக்கிறாள்.நானோ என் மேல் எப்போதுமே அன்பில்லாத ஒருவரை தெரிந்து கொண்டு விட்டேன்.இழப்பு எனக்கல்ல!" என்றான் தெளிவாக.

No comments: